ՈՒՐԱԽ ՍԻՐՏԸ ԱՌՈՂՋԱՐԱՐ Է :)

Հաճախ կարելի է հանդիպել մարդկանց, ովքեր տարակուսանքով  կնայեն կատակասեր հոգևորականին, կան և այնպիսիք, ովքեր համոզված են, թե քրիստոնյան կամ հոգևոր մարդը հումորից հեռու անձնավորությունն է... «Եթե մարդը հումորի զգացում ունի, նշանակում է, որ նրա հոգին քնած, սառած չէ. այն ապրում է և շարժման մեջ է»,- գրում է 20-րդ դարի մեծագույն աստվածաբաններից Կարլ Բարթը :
Անձամբ ես միշտ կարևորել եմ հումորը և հավատացած եմ եղել, որ հումորի առկայությունը մեր կյանքում շատ բան կարող է փոխել և լուծել, միայն թե այն ասվի ճիշտ տեղում և ճիշտ ժամանակին, լինի հումոր, որը չի վիրավորում դիմացինի արժանապատվությունը, չի անցնում քաղաքավարության սահմանները, չի գռեհկանում... Նման պարագայում Աստվածաշնչյան իմաստությունը շատ պարզ ճշմարտություն է բացահայտում. «Ուրախ սիրտը առողջարար է...» (Առակ. 17:20):

Այսպես, հօգուտ մեր «առողջության», այսօր առաջարկում եմ մի քանի անեկդոտներ, որոնք որոշակիորեն կապված են հոգևոր թեմատիկայի հետ: Հուսամ ժպիտով կկարդաք դրանք և անգամ նույն թեմատիկայի շրջանակներում կպատմեք ձեր լսածներից 1-2-ը: Ցանկության դեպքում կարող եք կարող եք հումորը ուղարկել էլ. հասցեին, և այն կարճ ժամանակ հետո կհրապարակվի այս բլոգում (ավելորդ է հիշեցնելը, որ հայհոյալից և վիրավորական հումորները բացառվում են):

* * *

Ուսուցչուհին մոտենում է ջանասիրաբար ինչ-որ բան նկարող աշակերտուհուն.

-      Այս ի՞նչ ես  նկարում, Սաթենի՛կ:

-      Աստծուն:

-      Բայց  չէ՞ որ ոչ ոք չգիտի, թե ինչպիսի՛ն է Աստված…

-      Հիմա ես կնկարեմ, ու բոլորը կիմանան…

* * *

Երկու ընկեր միասին վիճում են: Մեկն աթեիստ է, մյուսը` քրիստոնյա:

-      Ես ոչ մի հրաշքի էլ չեմ հավատում,- ասում է անաստվածը:

-      Հապա ինչպե՞ս պատահեց, որ ծովը բացվեց և հրեաները անցան դրա միջով,- առարկում է քրիստոնյան:

-      Շատ պարզ. ուղղակի անցման տեղում ծովը մարդկանց ծնկներից էր:

-      Բայց զարմանալի է, որ այդքան քիչ ջրում եգիպտացիները խեղդվեցին:

* * *

Քարոզի ավարտին մի կին մոտենում է հոգևորականին ու ասում.

-      Հա՛յր Սուրբ, շնորհակալ եմ քարոզի համար, այն շատ հավանեցի, իսկ և իսկ հարևաններիս մասին էր:

* * *

Սողոմոն իմաստունի մոտ են գալիս 2 կին և ներկայացնում են մի երիտասարդի:

-      Մեր դուստրերը սիրահարվել են այս տղային և մենք հիմա չենք կարողանում բաժանել, թե ո՛ւմ հետ նա պետք է ամուսնանա: Ո՜վ մեծդ իմաստուն արքա, լուծի՛ր այս խնդիրը,- խնդրում են նրանք:

Արքան մի փոքր մտածելուց հետո հրամայում է.

-      Բերեք իմ սուրը, և ես կկիսեմ երիտասարդին` ամեն մեկիդ կհասնի կեսը:

-      Օ՜, ոչ, ի՞նչ եք ասում, արքա,- ահաբեկված ճչում է կանանցից մեկը, մի սպանեք նրան:

-      Ճի՛շտ է, արքա՛, կիսեք երիտասարդին, որ մենք այլևս չվիճենք,- պատասխանում է երկրորդը:

-      Երիտասարդը կդառնա այս վերջինի դստեր ամուսինը,- որոշում է Սողոմոնը:

-      Ինչպե՞ս թե,- զարմանում են բոլորը. չէ՞ որ նա կողմ էր փեսացուին սպանելուն:

-      Այո,- հաստատում է Սողոմոնը,- նա իրեն պահեց իսկական զոքանչի նման:

* * *

Թոռը հարցնում է պապիկին.

-      Պապի՛կ, ճի՞շտ է, որ չարությանը պետք է բարությամբ պատասխանել:

-      Այո՛, փոքրի՛կ, ճիշտ է:

-      Վա՜յ, ես հենց նոր ջարդեցի քո ակնոցը. պաղպաղակ կառնե՞ս:

* * *

Մի քրիստոնյա օրիորդ աղոթում է առանձնության մեջ.

-      Տե՛ր իմ, աղաչում եմ լսի՛ր աղոթքս և մի՛ անտեսիր այն, քանի որ ինչ-որ խնդրում եմ, ինձ համար չէ, որ խնդրում եմ, այլ մայրիկիս: Խնդրում եմ քեզ, Տե՛ր, մայրիկիս համար մի լավ փեսա գտի՛ր:

* * *

Մի առիթով զրուցում են քրիստոնյան, մահմեդականը և հրեան:

Քրիստոնյա – Ինքնաթիռի մեջ էինք, երբ հայտարարեցին, որ շարժիչը վառվում է: Քիչ էր մնում մահանայինք, աղոթեցինք, և հանգիստ վայրէջք եղավ:

Մահմեդական – Մի անգամ էլ մենք անապատում էինք, ավազակները հարձակվեցին, որ սպանեն մեզ, աղոթք արեցինք, և փոթորիկ բարձրացավ ու քշեց նրանց:

Հրեա – Ես էլ մի անգամ շաբաթ օրով, երբ արգելված է հրեաներիս որևէ գործ անել, դուրս եկա բակ, տեսնեմ մի հաստ դրամապանակ է ընկած: Ես աղոթեցի, և հրաշք եղավ. թեև օրը բոլորի համար շաբաթ էր, ինձ համար այն Աստված հինգշաբթի դարձրեց:

Միացի՛ր ՍԱՐԿԱՎԱԳԱԳՐՔԻՆ նաև facebook-ում