17.4.12

ԻՄ ԱՌԱՋԻՆ ՆԱՄԱԿԸ ԴՍՏԵՐՍ


Եվա՛, գեղեցկուհի՛ս, ես գիտեմ, որ դու հիմա չես կարող կարդալ այս նամակը, գիտեմ, որ բառերը ի զորու չեն քեզ ոչինչ հասկացնելու, սակայն մյուս կողմից վստահ եմ, որ մարդկային զգացմունքների ամենամեծ թարգմանը` բռնցքաչափ սիրտը, առատորեն քեզ պիտի փոխանցի այն սերը, հուզումը, ջերմությունն ու հոգատարությունը, որոնք ես` քո հայրը, այս պահին համարձակվում եմ սահմանափկել սոսկ տառերի ու բառերի մեջ:

Ես (ու թերևս մայրիկդ ևս) այս մի քանի օրերի ընթացքում դեռևս չեմ հասցրել ըստ ամենայնի գիտակցել ու ընկալել, թե ի՛նչ բան է ծնող լինելը, բայց մի գաղափար, այն, որ Աստված մեզ` ծնողներիդ, շնորհ արեց մասնակից լինելու Իր արարչագործությանը, միայն երջանկության ու երախտագիտության արցունք է ծնում իմ աչքերում:

Միևնույն երջանկության հոգևոր վերապրումն ունեցա նաև այսօր`մկրտությանդ օրը. այսօր վերստին ծնվեցիր, Հոգուց ծնվեցիր: Գիտե՞ս, ես ժամանակին, երբ դեռ մանուկ էի (քեզանից ընդամենը մի քանի տարով մեծ), շատ երեխաների պես կարծում էի, թե նորածիններին խանութից են գնում: Միշտ մտածում էի, որ հայրիկիս` ինձ տրված գումարներից պետք է խնայեմ, որպեսզի երբ մեծանամ, կարողանամ գնել ամենաթանկ ու ամենալավ բալիկին: Այսօր վերհիշեցի այդ միամիտ մտածումս ու ժպտացի. քեզ արժանի գումար կուտակել, աղջի՛կս, ինձ երբեք չէր հաջողվի, հատկապես որ քեզ համար վաղուց վճարել են... Իր Արյամբ վճարել է քո իսկ Արարիչը` Քրիստոս Աստված...

Այս անցած 8 օրերի ընթաքում չափազանց շատ բարեմաղթանքներ եմ ժողովել քեզ համար` առողջ լինես, հաջողակ, ծնողներին լսող, երջանիկ...
Ցանկացած ծնող մաղթանքների այս ծաղկեփունջը կցանկանա ունենալ ու նվիրել իր զավակին, բայց... Ֆիլմերում անգամ այդպես չի լինում: Կյանքում բոլորին են հասու հիվանդությունները, անհաջողությունները, դժբխտության զգացումներն ու հակառակությունները, և սրանց հաղթահարումից, միայն ու միայն սրանց ճիշտ հաղթահարումից  են կախված քո երջանկությունը, առողջությունը, հաջողակ լինելը...

Դո՛ւ, փոքրի՛կ, այլևս միայն իմը չես: Իմացի՛ր, դու նախ և առաջ Քրիստոսինն ես: Նա՛ է, որ այսօր քեզ դարձրեց իր Արքայության ժառանգորդը, ծնեց որպես նոր մարդ` քեզ տրված նախամոր անունը փոխարինելով Աստվածամոր Մարիամ անունով: Նա՛ է քո Տերը, քո օգնականն ու ապավենը: Կյանքդ սկսվել է Նրանով և պարտականություն համարիր ապրել կյանքդ Նրանով...

Իմացի՛ր, փոքրի՛կս`

Եթե մի օր հանկարծ զգաս, թե միայնակ ես ու լքված, մի՛ հուսահատվիր, որվհետև Քրիստոս Որդին քեզ հետ է:
Եթե երբևէ բախվես դժվարության, մի՛ ընկրկիր. Տերն է քո օգնականը:
Եթե պատահի, որ տկարանաս մարմնական ախտով, մի՛ սպանիր հոգիդ. Աստված լսում է աղոթքները քո:
Եթե կարծես, թե պակասել է սերը մարդկանց, մի՛ չարացիր, այլ ներիր նրանց, որովհետև Քրիստոս սիրում է քեզ անմնացորդ ու բոլորից շատ:
Եթե անգամ մի օր ստիպված լինես վաճառել ամեն-ամեն ինչ, չվաճառես միայն Աստվածաշունչդ. դրանով է Քրիստոս խոսում քեզ հետ:
Եթե պարտադրեն ամեն բան ուրանալ, կարող ես ուրանալ մինչև անգամ ինձ, բայց ոչ երբե՛ք Աստծուն...

«Քանի որ նրանից, նրանով և նրա համար է ամեն բան։ Նրան փա՜ռք հավիտյանս։ Ամեն» (Հռոմ. 11:32):

Ես համոզված եմ, որ այն, ինչ հիմա ասում եմ քեզ, ամենևին էլ նորույթ չէ քեզ համար. հրեշտակները վաղուց պատմել են այն քեզ: Միայն թե, երբ տարիներ անց կյանքի ու մարդկանց, ծնողներիդ ու հարազատներիդ սխալները կբթացնեն ու մոռացնել կտան Աստվածային ճշմարտությունը, կարդա՛ նամակն այս, խնդրում եմ, և մի՛ մոռացիր քո ջինջ աղոթքներում հիշել քեզ սիրող հայրիկին ու մայրիկին:

Բարի գալուստ Կյանք. Տերը միշտ քեզ հետ, ի՛մ գեղեցկուհի:
Շատ եմ սիրում քեզ...
Քո` հայրիկ
17.04.2012

6 արտահայտվիր:

John Doe комментирует...
18.04.2012, 7:02

Աստված պահապան Ձեր փոքրիկ Հրեշտակին Տեր Հայր ջան :)

Աննա комментирует...
18.04.2012, 9:54

Ինչ գեղեցիկ էր Տեր Հայր ջաաաաաաաաաաաաաաաաաաան ու անկեեեեեեղծ

Tina комментирует...
18.04.2012, 21:30

Բարի գալուստ Կյանք.))))))))))

Beatle комментирует...
19.04.2012, 12:28

Եվա ջան եթե մեծանաս ու քո հայրիկի նամակի հետ հնարավոր լինի կարդալ բոլոր այս մեկնաբանությունները, ուրեմն իմ կողմից էլ քեզ բարև:) Իմացիր որ, դժբախտաբար, բոլոր երեխանները չէ, որ պարուրված են ծնողական այսքան ջերմ ու քնքուշ սիրով, ոչ բոլորն են ակնհայտ սիրո կատարյալ դրսևորում, իսկ Դու էդպիսինն ես, իսկ դա հիասքանչ է: Վստահ եմ, որ քո ծնողների անմնացորդ սիրո ու ուշադրության շնորհիվ զերծ կմնաս աշխարհի բազում ախտերից:
Շնորհավոր մուտքդ Կյանք...
Վստահ եմ նաև, որ ծնողներդ քեզանով հպարտանալու բազում առիթներ են ունենալու: Հիասքանչ է, երբ գիտես, որ ծնողներիդ սերն ու օրնությունը միշտ ուղեկցելու են քեզ, ուր էլ, որ լինես:
Բարև և բարի գալուստ

Анонимный комментирует...
19.04.2012, 23:11

… Ես հրեշտակ չեմ եղել, բայց որքան կարողացել եմ, ձգտել եմ մարդ լինել:

Փորձիր և դու:/Չ, Չ,/
Սեփական մտքերս չկարողացան հասնել այն բարձունքին, որտեղից հորդում էր այս պարզ ու անսահման սիրո ջրվեժը:Շնորհավորում եմ:

Srk. комментирует...
26.04.2012, 12:35

Բոլորիցդ անչափ շնորհակալ ենք ես, երեցկինը և Եվուլիկը

Отправить комментарий

Շնորհակալություն մեկնաբանության համար: Եթե Ձեր մեկնաբանությունը առնչվում է հոդվածի նյութին, չի պարունակում վիրավորանքներ և կասկածելի չէ բովանդակությամբ, ապա կարճ ժամանակում այն անպայման կհրապարակվի: Աստված օրհնի Ձեզ:

Related Posts Plugin for WordPress, Blogger...