14.11.11

ԳԵՂԵՑԻԿ ԿԻՆԸ

Ստորև ներկայացված է երիտասարդ ու գեղեցիկ մի կնոջ անկեղծ խոստովանություն, որը գրավոր կերպով արձանագրել է կրոնական փիլիսոփայության ականավոր ներկայացուցիչ Իվան Իլյինը: Կանացի գեղեցկության մասին այդ ակնարկից ներկայացնում եմ փոքրիկ մի հատված` ռուսերենից ազատ թարգմանությամբ:

«...Մարդկանց մեծամասնության համար կնոջ գեղեցկությունն ընդգծվում է սոսկ արտաքինով. հիանում են նրա մարմնով և ցանկանում են այն (այնքա՜ն հաճախ, այնպե՜ս տարրականորեն ու աննպատակ են ցանկանում այն): Ամենևին «անհրաժեշտ չէ» որ կինը լինի խելացի, նրբանկատ, կիրթ: Հոգևորի հետ ևս նա կարող է ոչ մի ընդհանուր բան չունենալ. դրանք միանգամայն  «ավելորդություններ» են, ինչպես, որ ավելորդ է վեցերորդ մատը ձեռքի վրա: Տղամարդիկ նայում են մեզ վրա, և նրանց հայացքը դառնում է ծանր, մշուշոտ ու հիմար: Կնոջ հոգու հանդեպ, որքան էլ այն լինի նուրբ ու հարուստ, նրանք հազիվ թե ունակ լինեն որևէ իրական հետաքրքրություն ցուցաբերել: Որքա՜ն հաճախ է ինձ առիթ ընձեռվում զգալ, թե ինչպե´ս է ինչ-որ մեկը անտարբեր անցնում կողքովս և իմ` այսպես կոչված գեղեցկությունն ընկալում որպես իմ ամբողջական էություն:
Այս իսկ պատճառով այնքա՜ն դժվար է դառնում մեզ համար իրական հոգևոր մերձեցումը, իրական ընկերությունը: Խելացի տղամարդիկ հաճախ անվստահ են`կարծելով, թե մենք անմիտ ենք ու դատարկ, իսկ մյուսները` ինքնավստահ և հանդուգն. հեշտորեն համարձակվում են մոտենալ մեզ, սակայն հաճախ ոչինչ չգիտեն ընկերության ու հոգևոր ներաշխարհի մասին:
Եթե միայն հնարավորություն ստեղծվեր լինել գեղեցիկ ոչ բոլորի, այլ միայն ոմանց` քչերի, ընտրյալների համար: Այդկերպ գուցե շատ ավելի լավ լիներ, սակայն իրականում այդպես չի լինում: Այս պատճառով ես հաճախ ասում եմ ինքս ինձ. «քանի դեռ մարդիկ չեն սովորել խնամել գեղեցիկ կնոջը, գեղեցկությունն առավելաբար բեռ կլինի կնոջ համար, քան երջանկություն, կլինի չարչարանք, քան ուրախություն»:
Միայն անզգամ, թեթևամիտ կանայք կամ նրանցից անմիտներն ու չարամիտներն են կարողանում անկաշկանդ հիանալ իրենց «գեղեցկությամբ»:
Կարո՞ղ է արդյոք գեղեցիկ լինել անմիտ կամ չարամիտ կինը, ես չգիտեմ: Իմ այս հարցին պետք է պատասխանեք Դուք` որպես շնորհակալություն այս անկեղծությանս»:

Միացի՛ր ՍԱՐԿԱՎԱԳԱԳՐՔԻՆ նաև facebook-ում

1 արտահայտվիր:

Հերմինե комментирует...
26.11.2011, 19:31

Հիանալի է խոսվում է հաճախ հանդիպող խդնիրներից մեկի մասին: Մանավանդ՝ «Եթե միայն հնարավորություն ստեղծվեր լինել գեղեցիկ ոչ բոլորի, այլ միայն ոմանց` քչերի, ընտրյալների համար: Այդկերպ գուցե շատ ավելի լավ լիներ, սակայն իրականում այդպես չի լինում: Այս պատճառով ես հաճախ ասում եմ ինքս ինձ. «քանի դեռ մարդիկ չեն սովորել խնամել գեղեցիկ կնոջը, գեղեցկությունն առավելաբար բեռ կլինի կնոջ համար, քան երջանկություն, կլինի չարչարանք, քան ուրախություն»»:

Отправить комментарий

Շնորհակալություն մեկնաբանության համար: Եթե Ձեր մեկնաբանությունը առնչվում է հոդվածի նյութին, չի պարունակում վիրավորանքներ և կասկածելի չէ բովանդակությամբ, ապա կարճ ժամանակում այն անպայման կհրապարակվի: Աստված օրհնի Ձեզ:

Related Posts Plugin for WordPress, Blogger...